फेरि आन्दोलनमा उत्रिए बालविकास शिक्षक र विद्यालय कर्मचारी

काठमाडौं । सप्तरीको हनुमाननगर कंकालिनी नगरपालिकाका सामुदायिक विद्यालयका कर्मचारी र प्रारम्भीक बालविकास सहजकर्ता (इसीडी शिक्षक)हरु पुनः आन्दोलनमा उत्रिएका छन् । सरकारबाट प्राप्त हुने सेवा सुविधा माग गर्दै सामुदायिक विद्यालयमा कार्यरत कर्मचारी र इसीडी शिक्षकहरु आन्दोलनमा होमिएका हुन् ।

नगरपालिकाले गत आर्थिक वर्षको दुई त्रैमासिकको तलब नदिएको कर्मचारी तथा शिक्षकले बताएका छन् । सोमबार विहानदेखि बेलुकीसम्म धर्नामा बसेका कर्मचारी र शिक्षकले माग पूरा नभएसम्म धर्ना दिने बताए ।

संघर्ष समितिका अध्यक्ष विद्यालय कर्मचारी इन्द्र नारायण राउतले नेतृत्व गरेको सो धर्ना कार्यक्रमा ५७ जना विद्यालय कर्मचारी र इसीडी शिक्षक सहभागी थिए ।
नगरका शिक्षा शाखा अधिकृत हरि नारायण शाहले बिनाकारण कर्मचारी तथा शिक्षकको हाजिरी काटेर दैनिकी तलब कटौती गर्ने र लामो समयसम्म तलब नदिने विरुद्ध धर्नामा बसेको राउतले बताए ।